Flamenco:Orígenes

Mae Flamenco:Orígenes yn dathlu’r llu o ffurfiau celf a gyfrannodd at esblygiad fflamenco. Gallwn olrhain gwreiddiau fflamenco i bob cwr o’r byd, o wreiddiau masnach hynafol i lwybrau llongau modern. Drwy gydol y sioe, mae’r chwe pherfformiwr yn teithio o un cyfandir i’r llall, gan ddilyn sut y symudodd gwahanol bobloedd drwy Andalusia, gan ddod â’u celf gyda nhw.

Gelwir yr is-arddulliau fflamenco yn palos, ac yn ystod y sioe gwelwn sut mae’r palos hyn wedi tyfu o wahanol ddiwylliannau; fel y Guajiras a darddodd o Giwba, neu'r Zambra sydd â gwreiddiau Gogledd-Affricanaidd. Mae Orígenes wedi bod yn daith ddarganfod i’r artistiaid hefyd, gan eu harwain i dreiddio’n ddwfn i chwilio am wybodaeth a aeth bron yn angof, ac i ddychmygu sut beth oedd bywyd diwylliannol Andalusia ganrifoedd yn ôl.

Mae Lourdes Fernández a’i Chwmni Flamenco yn eich croesawu i ymuno â ni ar yr antur epig hon sy’n ymestyn dros sawl cyfandir a channoedd o flynyddoedd a darganfod mwy am y ffurf gelf hardd, gyfoethog a elwir yn fflamenco erbyn hyn.